Nahum 3

Maye Kuyo INiniva

1Maye kulo idolobho legazi,
ligcwele amanga,
ligcwele ukuphanga,
kasweleki ohlutshwayo lanini!
2Ukukhala kwezaswebhu,
ukugodlozela kwamavili,
ukumatha kwamabhiza
lokugedlezela kwezinqola zempi!
3Ukuhlasela kwabagadi bamabhiza
ukuphazima kwezinkemba
lokubenyezela kwemikhonto.
Zinengi izinkubela,
izinqwaba zabafileyo,
izidumbu ezingabalwayo,
abantu abakhubeka ezidunjini,
4konke ngenxa yenkanuko embi yesifebe,
siyakhanga, siyinkosikazi ephethe ubuthakathi,
esifaka izizwe ebugqilini ngobufebe baso
labantu ngobuthakathi baso.

5“Ngimelana lawe,” kutsho uThixo uSomandla.
“Ngizakwembulela izidwaba zakho ebusweni bakho.
Ngizatshengisa izizwe ubunqunu bakho,
lemibuso ihlazo lakho.
6Ngizakujikijela ngamanyala,
ngizakweyisa,
njalo ngikwenze ube ngumbukiso.
7Bonke abakubonayo bazakubalekela bathi,
‘iNiniva isichithekile, ngubani ozayililela na?’
Ngingamthola ngaphi ongakududuza na?”

8Wena ungcono na kuleThebesi
engaseNayili,
ehonqolozelwe ngamanzi?
Umfula wawuyisivikelo sayo,
amanzi engumduli wayo.
9IKhushi leGibhithe kwakungamandla ayo angapheliyo.
IPhuthi leLibhiya kwakungabanye abancedisi bayo.
10Kodwa yathunjwa
yaya ebugqilini.
Izingane zayo zapaklazwa zaba yizicucu
ekuqaliseni kwemigwaqo yonke.
Kwenziwa inkatho ngezikhulu zayo,
wonke amadoda aphakemeyo abotshwa ngamaketane.
11Lawe futhi uzadakwa;
uzakuyacatsha
udinge ukuphephela esitheni sakho.

12Zonke izinqola zakho zinjengezihlahla zemikhiwa
ezilezithelo zazo zakuqala ezivuthiweyo;
lapho zinyikinywa,
imikhiwa iwela emlonyeni womudli.
13Khangela amabutho akho wonke,
ngawesifazane!
Amasango elizwe lakho
avulekele izitha zakho aba banzi;
umlilo uyiqedile imigoqo yawo.

14Donsa amanzi ulungele ukuvimbezela,
qinisa inqaba zakho.
Voxa udaka,
nyathela ibumba,
lungisa okwakhiwe ngezitina.
15Khonapho umlilo uzakuqeda;
inkemba izakucakazela phansi,
ikudle njengesikhongwane.
Zandise njengesikhongwane,
uzandise njengentethe.
16Usulandisile inani labathengisi bakho.
Baze bedlula izinkanyezi zasemkhathini,
kodwa njengentethe baphundla ilizwe
basuke bahambe.
17Abalindi bakho banjengentethe,
izikhulu zakho zinjengemitshitshi yentethe
ezihlala emidulini mhla kuqanda
kodwa ilanga lingaphuma ziyaphapha zihambe,
njalo kakho okwaziyo ukuthi ngaphi.

18Wena nkosi yase-Asiriya, abelusi bakho bayawozela,
izikhulu zakho zilala phansi ziphumule.
Abantu bakho bahlakazekile ezintabeni
kungekho obaqoqayo.
19Akukho okungapholisa amanxeba akho;
ukulimala kwakho ngokokufa.
Bonke abezwa izindaba ngawe
batshaya izandla ngokuwa kwakho,
ngoba ngubani ongafuthelwanga
yisihluku sakho esingapheliyo na?